Jan Lupo Makan Ubek

Ado istilah dalam kehidupan sahari-hari di antaro kito urang Minang yaitu “jan lupo makan ubek”. Nampaknyo satiok-tiok kito ko alah bapotensi mampunyoi panyakik di badan. Panyakik nan di kanduang ado nan dari pola makan, pola pikie, genetik jo politik bagai. 

Baa dek sato sato pulo politik ka panyakik ?

Sahubungan jo pilkada nan ado di Sumatera Barat kini utamonyo di Payokumbuah Luak Nan Bungsu, ado tigo pasang calon pamimpin nan sacaro resmi diakui melalui rilis KPU Kota Payokumbuah.

Kini katigo pasang calon ko sadang bapacu-pacu mangumpuakan suaro paliang banyak dari pamiliah nan alah terdaftar di DPT. Sabalumnyo alah banyak caro jo metode nan dipakai untuak manangguak pandukuang. Ado jo nan datang ka lapau , ka surau, ka dangau sampai mintak dukungan ka sanak di rantau.

Apobilo nanti kenyataan indak sasuai jo harapan, tantunyo ado saketek banyak bapangaruah ka kondisi kesehatan apak-apak nan mancalon ko. Makonyo sadio payuang sabalun hujan. Ijan beko tajungkang dek takajuik manarimo berita nan buruak yaitunyo “Kalah”.

Kecek tetangga ambo Uwan Siri, “kok takuik jatuah jan mamanjek, kok takuik tabanam jan baranang”. Satiok-tiok karajo nan dikakok saharusnyo nan punyo karajo haruslah mempersiapkan diri lahia jo batin agar sagalo konsekuensinyo dapek di tarimo jo lapang dado. Jan beko manjadikan marusak ka badan diri. Kok manang buliahlah galak, tibo di kalah kamalah kabatenggang. (Rahmat Sitepu)