 |
| Penulis : Ampera Salim |
Si Pekok, muncuangnyo bakaleperan.
Asah taosok sajo. Kadang bacaruik di nan rami. Kadang mahino
bakatarangan. Pendeknyo, si Pekok tamasuak bamuluik ndak salai, ndak
pakai saringan. Baitu pandapek sabagian urang nagari.
Samantaro,
ado lo sabagian lain mamuji si Pekok. Katonyo Pekok kasek daun pimpiang.
Pas bana mamacik nagari nan saroman iko. Kalau ndak mode Pekok, ndak
kabarubah wujuik nagari.
Karano duo pandapek ko lah, nagari
mulai buncah. Tambah buncah karano Pekok manyabuik kaji nan indak patuik
dobaconyo. Sudahlah ndak bauluak, inyo lah mangaku barasiah pulo.
"Piliah sajolah waden. Ijan amuah kalian dialua dek ungku ungku tu,
supayo indak mamiliah waden," kecek Pekok suatu kali.
Mako dek
karano kecek Pekok itulah, mambuek ungku ungku tasingguang. "Oi Pekok
ndak basunat. Waang ko lah mahino kami mah. Turun waang. Kok lai jantan
waang kamarilah," hariak ungku ungku di muko rumak si Pekok.
Pekok haniang sajo. Inyo ndak hirau jo hariak mahariak. "Waden kini
urang bagak di nagari ko. Waden nan punyo nagari ko. Bara sajo harago
nyawa kalian waden bali mah. Hantu," kecek si Pekok babisiak surang
dalam biliak.
Sabagai urang nan dahulukan salangkah, ditinggian
sarantiang, Pekok yo tamasuak urang bagak. Saisi nagari ko tunduak ka si
Pekok. Sabuiklah pandeka, upeh, dubalang. Kasadonyo, marukuak ka si
Pekok. "Kok paralu sanagari ko urang bisa waden lawan. Ijan cubo cubo jo
waden," kecek pekok suatu maso.
Kini sado urang nan ndak suai jo
paham Pekok, lah manyatukan langkah mintak Pekok dikabek. Samantaro
Pekok sanyum sanyum di Singapua jo urang urang nan saparinduan jo inyo. Di lapau Mak Uniang, Pekok jadi buah bibia. Ndak ado hari kok indak curito Pekok...